Sompat o Bitiyala Pantag sa Kambetadan O Babay Sa Islam

Mga suledami a manga babay, masla man i kambetadan tano a manga babay kano Agama Islam, apya so manga lukes, , suled atawka so manga pagali tano a manga mama na iniganat kano paganay pan a timpo sampay den saguna na nangimpatay silan sa ped a sabap a kinapangimpatay nilan na sabap kano kapendalinding nilan salkitano a manga babay, nakaibarat tano sa muntiya a tidto a tininggamo no mga mama yanilan tinumo i kapatay asal a maka-safety nilan so maratabat tano.

Na izan tano kona mambo manga suled nami so manga ginawa tano o nginto tinggamon tano bon so manga ginawa tano mismo sa apya endaw tano mipimpil a dalpa? Upama ka aden bon mambo maratabat tano kano bangsa tano na aden anya a dayt-patot a kasabutan tano,solimanen tano sa mapya ka so niya ba na pantag sa kadtatanusan tano a manga babay! Kena yanin ma'na i mawag so kadtatanusan o babay sa Islam ugayd na aden anto na di kadsuliman no sabad na pakasubra kano guris no kabpagagama nin, so Islam na dikena mapasang ka tembo inituron so Nabi ka go kalemuwan so manga pagetaw nin, mipamando nin so manga mapiya a ukit sarta na isa inya a lalan sa kasampurna no kapulo a kambetadan no sekitano a manga babay namayngka kasabutan tano inya ba go tano masampay so limo no Allahu Ta'ala ka sa taw a dili nin panulimanem so niya ba na makawatan den kano limo no Allahu Ta'ala. kagina ka mayto na niya so dayt a zanggilan no sekitano a manga babay: paganayan na so kad-tattoo atawka kapanago sa tattoo siya sa biyas atawka apya endaw den ko lawas o taw; ikaduwa na so kapangawa sa bok sa biyas mana so kapangubpit sa kilay; ya manem ikatelo na so kasumpat sa ngipen ya mayto na tebpeden so ngipen mapasad na sumpatan sa lagid bon o ngipen atawka pamulan sa ngipen asar bo a kaumanan so kanisan. Niya so Hadeeth a nakaukit kani Abdullah a wata mama ni Mas'oud, pidtalo no Nabi Muhammad (SAS): ((Nakawatan den kano limo no Allah so manga babay a panago sa tattoo endo so manga babay a papedtago sa tattoo, so manga babay a pangawa sa bok a biyas endo so manga babay a pabpangawa sa bok a biyas, so manga babay a papedsumpat (pabpamula) sa ngipen asar bo a kanisan, manga babay a panambiyan nilan so kinapamaloy no Allah)). So niya a Hadeeth na yalon nakapanudtol na si Muslim, mapya inya a Hadeeth.

So timpo a paganay na so manga babay na siya silan pedta-tattoo sa lima tampal sa likod a lima, saguna na siya den sa palas dikena manga babay bo ka sabad kano manga mama na pedta-tattoo den silan, na dili inya pakaayon a galbekan kano Agama Islam. So kabpangawa sa bok a biyas na ya den tidto a puntos nin na so kabpangikis sa bok na kilay sa aden anto na pakanipisen so kilay atawka pamadtuden, ped inya kano pedsanggilan tano a manga babay.
Italos tano bo so niya ba bityala sa manga tumundog a timpo o miyog so Allah…