Ang Pagbabalik-loob Kay Allah

Ang sabi ni Allah: Magbalik –loob kayong lahat , o mga sumasampalataya, upang sa gayo’y magtagumpay kayo. (24 :31 )

O mga sumasampalataya, magbalik-loob kay Allah nang may katapatan at pagsisisi. (66 : 8 )

Ayon kay Al-Gharr binYasar ( RA ), sinabi ng Sugo (SAS) na: O mga tao, magbalik-loob kayo kay Allah at humingi kayo ng patawad sa Kanya sapagkat ako nga ay nagbabalik-ploob sa Kanya isang-daang beses isang araw.

Ayon kay Anas (RA), sinabi ng Sugo ni Allah (SAS) na: Si Allah ay higit na nalulugod sa pagbabalik-loob sa Kanya ng Kanyang lingkod kaysa sa sinuman sa inyo na natagpuan ang kanyang kamelyo (na may dala ng kanyang pagkain at inumin ) matapos itong mawala sa walang kabuhay-buhay na disyerto.

Ayon kay Anas (RA), sinabi ng Sugo ni Allah (SAS) na: Ang lahat ng mga anak ni Adam ay nagkakamali at ang pinakamainan sa mga nagkakamali ay ang mga nagbabalik-loob.

Ayon kay Abdullah bin Umar bin Al-Khattab (RA), sinabi ng Propeta (SAS) na: Tunay na si Allah, ang makapangyarihan at maluwalhati, ay tumatanggap ng pagsisi ng Kanyang lingkod hangga’t hindi ito naghihingalo.

Ayon kay Abu Moosa Al-Ash’aree (RA), sinabi ng Propeta (SAS) na: Iniaabot ni Allah ang Kanyang kamay sa gabi upang makapagsisi ang nakagawa ng masama sa araw at iniaabot Niya ang Kanyang kamay sa araw upang makapagsisi ang nakagawa ng masama sa gabi. Ginagawa Niya ito hangga’t hindi pa sumisikat ang araw sa kanluran ( na siyang tanda ng wakas ng mundo).

Ang mga Aral

1. Kailangang magbalik-loob kay Allah sa lahat ng oras maging ano pa man ang kasalanan at maging gaano man ito kalaki. Ang pagbabalik-loob ay isa sa mga dahilan na ikapagtatagumpay at ikaliligtas ng isang tao.
2. Ang pagbabalik-loob kay Allah ay lubhang napakahalaga. Ang habag at kabutihan ni Allah ay napakalawak anupa’t Siya ay nagagalak sa pagbabalik-loob ng isang tao sa Kanya.
3. Ang pagkakamali ay isa sa mga kalikasan ng tao. Gayunman, kailangan pa rin niyang pagsisihan at ihingi ng kapatawaran ang kanyang mga kasalanan.

Ang Kundisyon sa Pagbabalik-loob

A. Na kailangang ang pagbabalik-loob ay bago maghingalo ang isang tao.

B. Na ito ay kailangang bago sumikat ang araw sa kanluran dahil kapag nagkagayon ay wala nang saysay ang pagbabalik-loob.
K. Na ang sinumang magsisi ng tapat sa kasalanan at saka magbalik sa dating kasalanan, ang una niyang pagsisi ay tanggap pa rin subalit kailangan niya ang panibagong pagsisi pa sa binalikang kasalanan.

D. Na kailangan talikuran ang kasalanan, pagsisihan ang mga nagawang pagsuway kay Allah, at maging desididong hindi magbabalik sa kasalanan.